बदल

बदल करता करता सारच गेलं बदलून,
सुखसोयींच्या जमान्यात जुनं सगळंच गेलं वाहून ।

प्लास्टिकच्या नळातून वाहताना पाणी गेलं सरून,
विहिरीवरच रहाट मात्र गंजत राहिले जागा धरून ।

कागदी फुलांनी जागा घेतली खऱ्या फुलांना बाजूला सारून,
डायनिंग टेबलंच्या जमान्यात पाट सुद्धा जमा झाले अंधाऱ्या खोलीत भिंतीला धरून ।

तव्यावरची भाकर गेली कुठल्या कुठे विरून,
दुकानातल्या पिझ्झ्याने सगळ्यांचीच मने घेतली आपलीशी करून ।

मोदक सुद्धा बनले मोमोज भाजीपाला आतमध्ये  सारून,
पाडावरचे  आंबे आले फंटाच्या बॉटल मध्ये भरून ।

रानातले काजू डब्यात बंद झाले भाव वदारून,
बदल करता करता सारच गेलं बदलून
सुखसोयींच्या या जमान्यात सुख मात्र गेलं विरून !!!